الحلقة (5) عجلاوي وتاني ايام الكلية

جاء تاني يوم .. واخينا عجلاوي كالعادة صاحي من الفجرية ولبس هدومه ومشي ....وصل الكلية الساعه 6 ونص ومفكر هيلاقيها صاحية .. قصدي فاتحة :)

عجلاوي : إنت يا اخينا ياللي ع البوابة !! قوم افتح انا جيت

البواب : جيت مين وافتح ايه ؟؟؟ الكلية بتفتح بعد ساعتين ...

عجلاوي : ياعم افتح الباب طيب أحجز مكان في المحاضرة

البواب : دا ايه الناس العجيبة دي ؟؟ امري لله ... ادخل

عجلاوي راح حجز في تاني بنش وحطّ حاجاته وطلع تاني برا يروح يشرب كوباية شاي علي بال المحاضرة ما تبدأ ...

عجلاوي بيقول للبواب : إلا قولي يا بلدينا ...فين أعرف اشرب كوباية شاي متينة كده ؟؟

البواب : فيه كافتيريا اسمها كافتيريا الطلبة .. الشارع اللي جاي ع اليمين

راح عجلاوي لكافتيريا الطلبه .... أيوا جااااااااااااااااااي

عجلاوي : واحد شاي بنعناع لو سمحت ... بس يكون مظبوط و3 معالق سكر

الراجل : مفيش شاي بنعناع .. فيه شاي لوحده ونعناع لوحده

عجلاوي : خلاص .. هاتلي نص كوباية شاي ونص كوباية نعناع

الراجل : اصطبحنا واصطبح الملك لله

عجلاوي : إيه يا أخينا .! هي مراتك مزعلاك وجاي تطلعهم عليا انا ولا ايه ؟؟

الراجل : إمشي ياض من هنا ياض ... دا ايه الاصطباحية المهببة دي ياربي !!!

عجلاوي مشي وراح يدور علي كافتيريا تانية

عجلاوي : سلام عليكم .

الولد : وعليكم السلام .. اؤمر يا باشا ...

عجلاوي : عندكم شاي ؟؟

الولد : طبعاً ياباشا ... أحلي كوباية شاي هتشربها عندنا

عجلاوي : وعندكم نعناع ؟؟؟

الولد : عندنا طبعاً ياباشا .. أحلي كوباية نعناع هتشربها عندنا

عجلاوي : طب لو سمحت عاوز كوباية ينسون ..

شرب عجلاوي الينسون بتاعه .. وقعد اتعرف علي شوية شباب قاعدين علي القهوة ... وبعد كده افتكر انه عنده محاضرة وكان فاضل عليها يدوب 5 دقايق .. رجع بسرعة للكلية ودخل المدرج ... لقي مين قاعد مكانه ؟؟؟؟؟

عجلاوي : إيه ده ؟؟ مكاني !! إنتي يا انسة ياللي قاعدة في مكاني ؟؟ انتي يا ....

( التفت عجلوي الي الفتاة فوجدها منال )

منال :  إيه الدوشة اللي انت داخل بيها دي ؟؟ وبعدين انا مش قاعدة مكانك .. كتبك وحاجاتك اهي ياسيدي .. لو أعرف انها حاجااتك مكنتش اتنيلت وقعدت هنا أساسا

عجلاوي : والله انا خايف لتكوني مخابرات ولا حاجه !!! ومسلطينك عليا انا بجا ....بسا نا بجا مش هقعد غير لما تقومي من البنش كله ..

منال : والله انا جيت ولاقيت المكان فاضي ... عاوز تتفضل حضرتك وتاخد حاجاتك وتمشي .. تبقي عملت فيا جميل .. إنما أنا مش هقــــــــــــــــوم

وبينما هما علي ذلك الحال ... وصوتهما يكاد يسمعه طلاب اخر بنش .... دخل الدكتور فوجد عجلاوي واقفاً يتحدث بصوت عالي ..

الدكتور ( ملتفتاً إلي عجلاوي ) : إنت يابني ياللي واقف ... إنت يابني ..

عجلاوي ( مش واخد باله ان ده الدكتور ) : استنا ياعم انت كمان ..

الدكتور :عم ؟؟؟ اسمك إيه يالـَه

عجلاوي : إيه ده ؟؟ أأ ... أنا أسف جدا يادكتور والله ... أصل .... ( قطعه الدكتور )

الدكتور : إسمك؟؟؟

عجلاوي : عجلاوي يافندم ... عجلاوي محمد عجلاوي

الدكتور :: عجلاوي !!! ودخلت طب بيطري بإسمك بقي ولا بمجموعك ؟؟

أضحك ذلك الكثير من الطلبة ولكن ذلك لم يؤثر علي عجلاوي بل دفعه إلي رد صارم موجّه لهم جميعاً وأولهم الدكتور ...

عجلاوي : والله يادكتور أنا اعرف ان الشخصية هي اللي الانسان بيتعرف بيها.. مش بإسمه ... وبعدين مافيه اسماء كتيرة غريبة طالعة الايام دي ..ورغم كده الناس بتفضلها وتقول دا اسم جديد وماشي الايام دي .. حتي ميعرفوش معناها ايه ...المهم عندهم يكون جديد وشغال ..ولا اللي بيسموا عيالهم علي اسماء الممثلين والممثلات .. سايبين كل دول ومستغربين من اسمي ؟؟


الدكتوراُعجب بشجاعة عجلاوي واعتذر منه علي الكلام اللي قاله ..وقاله ( لو عوزت اي حاجه ابقي تعالي المكتب عندي )
ومنال هي كمان حاست انها جزء من المشكلة وانها تسبتله بإحراج .. فقامت ورجعت اخر بنش ..
ومرت المحاضرة بهدوء وسلام ..و قد أحضر معه في هذه المرة برايته .. :)

الحلقه(4) عجلاوي مع الحصان

خرج عجلاوي من المحاضرة السابقه .

. 

وبعد ذلك توجه إلي السكشن مباشرةً 

.. سكشن Behavior

ولم يلاحظ أن هناك فترة break

بين المحاضرة والسكشن ...ورغم ان جميع الطلبة والطالبات تبدو عليهم ملامح الفرحة والسعادة بالجو الجديد بالجامعه ... إلا ان عجلاوي استقبل يومه الاول في الجامعه بشئ من الاستغراب والمقارنه بين حاله وحال هؤلاء الطلبة الاخرين ...

وبينما هو جالس في ركن ما .. جاء عم عيسوي السايس بتاع الحصان .. ومعاه الحصان .. ثم ترك الحصان يأكل من العشب .. وذهب

عجلاوي : وااااااااه .. إيه الحصان الابيض ده :)) ده شكله جميل جوي .. أمـّـا اروح اشوفه كده ...

 

عجلاوي راح قرّب من الحصان وحسّس عليه ..ومن فرحته بالحصان وبلونه الابيض الناصع ... فكّر في انه يركب عليه .. وبالفعل ركب علي الحصان واخذ يتجول به هنا وهناك .. وعندما رآه الطلبة أخذوا جميعهم في الضحك الشديد عليه ... بل أخذوا يصورونه بالموبايلات
وبينما هو كذلك ..... راه دكتور السكشن

الدكتور : إنت يابني ... انت فاكر نفسك في نادي الخيول ولا ايه ؟؟؟انزل يالََـَه ... وفين الزفت اللي اسمه عيسوي ده كمان ..!!

عجلاوي :: آآآن ... آآناا ...أنا اسف والله يا دكتور .. انا بس كنت ...

قطعه الدكتور

الدكتور : كنت بتشوف الارصاد الجوية من فوق صح؟!! يلا روح نادي زمايلك عشان هبدأ السكشن

عجلاوي : لا يادكتور والنبي اعفيني ... خلّي عم عيسوي يناديهم ... عموما هم اكيد 5 دقايق وتلاقيهم جايين .. هيروحوا فين يعني ..

بدأ الدكتور السكشن ببعض التعاريف التي يجب علي الطلبة معرفتها فيما يتعلق بمادته ... ثم بعد ذلك أدخل الحصان .. مما أرهب الكثير من الطلبة وطبعاً الطالبات ... إلا أخينا عجلاوي ... فلم يكن بداخله تلك الرهبة ..

الدكتور :  إيه يا دكاترة المستقبل ؟!! إنتوا هتخافوا من أولها ؟؟ لأ لازم تعرفوا ان الحصان إو أي حيوان لما بيشوف ان الانسان اللي قدامه خايف .. هو كمان بيبادله نفس الشعور تجاهه ... واحتمال كبير يرفثه كمان .. ها؟؟ مين عنده الشجاعه بقي يطلع يقولنا اللي انا قولته ؟؟ أه .. إنت ( يشاور علي عجلاوي ) أيون إنت ... اللي عملتلي فيها جوكي انهارده ... تعالي ورّي زمايلك هندلت الحصان إزاي ...

عجلاوي طلع ووقف جمب الحصان وقعد يحسّس بايده عليه ... ويبدو أن الحصان أخد عليه هو كمان .. فلم يصدر صوتاً او لم يحرك ذيله ... مما أبهر الطلبة  :)

عدّا أول يوم علي خير :) .. ورجع عجلاوي البيت واستقبلوه أخواته كأنه راجع من بلاد برا ... وأخذ يقص عليهم أحداث اليوم وكيف أنه أبهر الدكاترة والطلبة :))))))

 تابعونا مع

عجلاوي وتاني ايام الكلية

الحلقة (3)

دخل عجلاوي المحاضرة ...وملقاش مكان غير في اخر بنش ..
كان فيه بنت قاعدة .. قعد علي بعد متر كده منها ..
وبدأ الدكتور بالترحيب لطلبة الدفعة الأولي وأنه يتبسم في وجوههم خيـــراً ... وأخذ يخبرهم عن مادته ..
ال Anatomy
تشريح يعني
وفي وسط المحاضرة ...


عجلاوي : والنبي يا آنســه .. عايز بـرّايــة

البنت : بــرّايــة إيه؟!! إنت في كلية حضرتك مش في حضانة !!!

عجلاوي : ياستي وانتي مالك !! معاكي ولا لأ ؟؟

البنت (ترد وهي متنرفذة ): لأ مش معايا ..

عجلاوي : طب ما تزعقيش ...


عجلاوي خبـّـط علي البنش بحيث إن الدفعة كلها سمعته ... وعندما تلفت الجميــع إليه قال 

  

والنبي يا جماعة إلاقي مع حد فيكم بــرّايــة "

أخذ الجميع يضحكون عليه ... والدكتور لاحظ ذلك وطلب من الجميع الهدوء .. وهدّد عجلاوي بالإنصراف مالم يقعد هادئاً

البنت (بصوت منخفض) : إيه اللي هببته دا !!! انت فاكر نفسك فين ؟؟

عجلاوي : مش لو كنتي معاكي بــرّايــة دلوجتي .. مكنش كل ده حصل !!!!

البنت : طيب طيب .. أنا هكتب المحاضرة وفي الاخر إبقي صوّرها ..

عجلاوي : متشكر جوي يا آنسة .... ؟؟ أنتي اسمك ايه ؟؟

البنت : منال

عجلاوي : متشكر جوي يا أنسة منال .. معاكي عجلاوي محمد عجلاوي :)

البنت (وهي تضحك ) : اسمك !!!!!!! عجلاوي !!

عجلاوي : إيوه اسمي عجلاوي وبلا فخر ..

البنت :طيب يا دكتور عجلاوي .. ممكن تسكت بقي عشان أعرف أكمل المحاضرة ..

عجلاوي : وريني كده خطك .. إيه العفاشة دي ... دا خط دا ؟؟؟  هقراه إزاي انا دلوجتي !!!

البنت : عفاشة !! والله أنا غلطانة أصلاً إني عرضت عليك تصوّرها .. روح دوّر بقي علي حد يدلك المحاضرة ..

عجلاوي : ياستي حقك عليا .. بس حسـّـني خط شويه عشان أعرف اقرااااه ..

البنت : هو خطي كده .. وبعدين فيه رسومات كتيرة ولازم ابقي سريعه شويه ...

وقبيل انتهائ المحاضرة ... الدكتور بيسأل الطلبة

الدكتور : ها يا شباب .. فيه أي أسئلة ؟؟

عجلاوي رفع إيده .. ويبدو إنه الوحيـــد اللي طلب يسأل

عجلاوي : آه يا دكتور ... بالنسبة يعني للكشكول ؟! نجيبه كام صفحه ؟؟

ولتاني مرة يـُـثير عجلاوي ضحك الطلبة عليه وكأنه من كوكب آخر ...

الدكتور : كشكول ايه يابني ... ماتكتب في اي حاجه ..

وانصرف الدكتور محدّثاً نفسه : صبّرني يارب

الحلقة (2)

وعــدت الأيام .. وجاء أول يوم في الجامعه .. وعجلاوي مانمش طول الليل  .. ومن الفجر لبس هدومه وحضّــر حاجاته ... وطبعاً مامته لازم ترقيه قبل مايمشي .. يلا بينا نشوف

عجلاوي : يلا يامّــه الساعه بجت 6 .. عاوز ألحق مواصلات بدري بدري عشان أكيد الجامعه بتفتح بدري

أم عجلاوي : حاضر يا حبيبي .. أنا بس بعملك 7 او 8 ساندويتشات عشان لما تجوع ..أوعي يا واد تجيب أكل من برّا .. آآه دول بيقولوا انه بيجيب سرطان بعد الشر عننا كلنا ..و سمـّــي كده يا حبيبي .. وخليك مركز .. و....

عجلاوي : ما خلااااااااص يا مـّـه ,, والله حفظت كل حاجه .. وبعدين أنا بجيت راجل يـُعتمد عليه ..... ادعيلي انتي بس يامـّـه ربنا يفتحها في وشي ...

أم عجلاوي : روح يابني .. إلهي يوقفلك ولاد الحلال ويبعد عنك شر الطريق

وصل عجلاوي الجامعه والحمد لله .. وبالرغم من هذا العالم الجديد .. إلا أن ذلك لم يُـحدث تغييراً ملحوظــاً علي طلاب الثانوية العامة ... طبعاً بإستثناء أخينا عجلاوي .. والذي بدا مندهشاً لهذا الحشد من الطلبة والجو المحيــــــط.....


عجلاوي : ياااااااااااه .. إيه الناس دي كلها .. أومال لو كانوا بيوزعوا لحمة كانوا بقوا اد ايه ؟؟!!

عجلاوي شاف واحد كده داخل لوحده .. فقام راح عليه

عجلاوي : سلام عليكم يا دفعة .. إنت معانا في سنة إولي ؟؟

الثاني : لا والله انا في سنه تانيه ..

عجلاوي : آآه .." عجلاوي متعجب من اللي أخينا لابسه بنطلون ساقط وشعر جيل وقميص كاجوال ...

عجلاوي : انت ازاي تنسي حزام البنطلون ؟؟يعني عجبك منظرك كده والبنطلون شويه وهيقع منك ... خلّي اللي مايشتري يتفرج بجي ....

التاني : ههههههههههههههههههههههههه ... عجباني أوي لهجتك دي يا مان ..إنت كده ولا بتمثل !

عجلاوي : أمثل إييييييييه يا أخينا .. إحنا جايين نهــذِّر ولا إييييييييييه

التاني : هههههههههههههه .. ياعم ماتزعلش نفسك ..خليك كوول ... أنا رايح أشوف الشلة بتاعتي .. وانت روح دوّر علي حد يفهمك .. سلام يا كابو

عجلاوي بدا غاضباً من ذلك الولد .. وأسلوبه الجديد .. وبدأ يفهم أنه سيعاني قليلاًَ في معاملاته مع من هم مثل ذلك الولد ... وبالطبع معظم الدفعه ...المهم .. راح شاف جدوله ونقله ... وراح علي اول محاضرة

الحلقــة (1)

عجلاوي محمد عجلاوي .. كان حلمه زي أي طالب في الثانويه العامه
.. يدخل طب بشري ويحقق أمنية أمه وابوه .. لكن للاسف
 .. شاء القدر وحكم عليه التنسيق بدخول كلية الطب البيطري بعد حصوله علي 95%
يلا بينا نروح نشوف عجلاوي بيقول ايه يوم التنسيق ما بان :)

أم عجلاوي : يا فضيحتك يا أم عجلاوي ..ياشماته أهل ابوك فيا ...بيطري .. اخرتها بيطري ؟!!.. اهئ اهئ اهئ
 

عجلاوي : فضيحه إيه بس يا أمه .. وانا أعملك إيه بس يعني؟؟ ماني كمان كان نفسي أدخل طب وابقي دكتور العذبة ويبقي ليا هيبة في البلد ..بس هعمل ايه بقاا.. منه لله التنسيق ابن الكلب ..بس ماتجلجيش يا أمه .. إن شاء الله وبعون الله أطلعلك أجدع دكتووووور بيطري في المُـديريه بحالها .. بس انتي ادعيلي يامـــّــه

أمه : واااااه .!! يعني انت يا واد ياعجلاوي لما تطلع الاول ع الدكاترة .. هتطلع في التالافزيون زي بتوع الثانويه كده ؟؟

عجلاوي : لا يامـّـه .. مش للدرجادي يعني .. أول ايه واخر ايه ..
ينظر عجلاوي في الارض هامسا : امي شكلها عندها داء الاوائل)
 

أمه : بتجول حاجه يا واااد؟
 

عجلاوي : لا يامـّـه .. وانا اقدر أقول حاجه بردو؟؟!

وفي نفس اليوم ... بعد العصر كده .. جاء أبو عجلاوي من الغيط ... وتبدو علي وجهه ملامح الحزن...
 

أبو عجلاوي داخل البيت متنرفذ : هو فين ابن ال .........، يا خسارة الفلوس اللي صرفتها عليه في الدروس ...ماكنت علّمته الشغل في الغيط مادام أخرتها هيرجع للغيط :( .. آآآآآآآآآآم يا دماغي

أم عجلاوي : ماتزعلش نفسك والنبي يا ابو عجلاوي .. .. ده البيطري ده بيجولوا انه بيكسب حلو جوي ..
وبعدين ده ابنك الكبير ..ولازم تشجـّـعه عشان يذاكر ويرفع  راسك ..واحنا ما نعلمش الخير فين ..

أبو عجلاوي : ماشي يا أم عجلاوي ..أهي دي أخرةتربيتك في ابنك .. يلا جفّـلي ع السيرة دي وروحي وضبيلنا لقمة ناكلها ..

أما أخينا عجلاوي ...بحبة الفلوس اللي كان محوشهم .. راح مع نفسه كده واشتري بالطو وسماعه .. ورجع البلد ودخل الاوضه بتاعته وخبـّـي الكيس اللي اشتري فيها الحاجات دي ..
ومن صباحية ربنا .. لبس البالطو وحط السماعة علي رقبته وطلع ع الغيط ..و كل اللي رايح واللي جاي عمّـال يضحك عليه .. وهو مش حاطط في دماغه .. الواد باينله داخل جد أوي ..شاف واحد مـُزارع كده . قام راح له
 

عجلاوي : والنبي يا أخينا ممكن توريني بقرتك كده .. أنـــــا الدكتور
 

الراجل : دكتور؟؟! ليه ؟؟ هي البقرة اشتكتلك ولا راحت طلبتك بالتلافون ؟؟

عجلاوي : ههههههههههه.. لا دمك خفيف جوي ..روح ياعم هاتلي البقرة اللي عندك .. هو انت لاقي دلوقتي دكاترة يجوا لحد عندك ؟؟

الراجل : أمري لله ..أهي عندك هناك أهي ..

عجلاوي : طيب تعالي امسكهالي ..

عجلاوي طبعاً مش فاهم حاجه في حاجه .. بس كان عاوز يعمل لنفسه هيبة وسط اللد ..

عجلاوي : البقرتين دول شبه بعض أوي .. انت بتعرفهم من بعض ازاي؟؟
 

الراجل : بقرتين ايه يا أخينا ..والله انت شكلك لا دكتور ولا نيله
 

 عجلاوي : إيه ؟؟ هما جاموستين ؟!!!
الراجل : ياعم دي بقرة ... ودا عجل..

 

عجلاوي : واااااااااااه .. انت ازاي تخليهم ياكلوا جمب بعض .. خلي الحريم تاكل في جمب .. والرجاله في جمب .. أحسن الحريم بياكلوا كتير اوي اوي .. ومش بيسيبوا حاجه للرجالة ..

الراجل : حريم مين يا جدع انت ... يلا يا عم روح من هنا أنا مش فاضيلك .. عطلتني عن شغلي ... إمشي ياعم

عجلاوي خدها من قاصرها ومشي ... وقلع البالطو والسماعة . وماشي في البلد حزنان ... بيفكر في العالم الجديد اللي رايحله ..
عـــــــــــــــــــــالم الجامعـــــــــــة

يا تري مين فيترواي ده ؟؟

السلام عليكم ورحمه الله وبركاته

بدايةً أحب أرحب بزوار مدونتي الكرام .. وتحية خاصه لطلاب الطب البيطري .. ربنا يوفقكم جميعا

فيترواي .. كلمة جاية من

vet 

اختصار لطبيب بيطري 

Veterinarian 

.. بس باللغه الشبابيه

ياتري ايه قصة فيترواي ده؟؟

هي مش قصة بالصراحه بالمعني الحرفي .. فأنا لا أجيد فن القصص بالشكل الامثل 

بس هي عباره عن يوميات .. ألفتها من مخيلتي .. مقتبسه بعض المعلومات اللي عرفتها في خلال السنه اللي عشتها في الكلية .. معلومات علميه وليس اكثر من ذلك .. انما باقي الاحداث فهي من مؤلفاتي 

طيب مين بقي اللي هيمثل دور فيترواي؟؟

أنا في الحقيقه قعدت ادور علي اسم يكون مش موجود في الكليه طبعا .. واسم يكون غريب شويه ..فسميته 

عجلاوي محمد عجلاوي 

اهو يبقي اسم لايق ع البيطري :) 

وعجلاوي ده ولد بسيط من اسرة الي حد ما بتجد قوط يومها وبتحمد ربها ..

هكمل لحضراتكم بقية التعريف بس لما أبدأ في تدون يومياته

طيب المدونة دي خاصة لبتوع البيطري بس ؟

لأ طبعا .. لأني بحاول فيها اني مش ادخل في تفاصيل علميه كتير 

المدونة لكل الناس .. لانها بتقدم بعض الفكاهات .. وبعض الافكار الجميلة ..كمان انها بتتعايش مع المستوي الطلابي المعروف 

وعلي كده بقي اليوميات دي لها نهايه؟

لها نهايه .. مع نهايه اعوامي الدراسيه ان شاء الله

يعني علي  سنه 2013 ان شاء الله

ههههههههههههههه

وهل هتكون يوميات اخينا عجلاوي يوم بيوم؟؟

لأ خالص .. إزاي يعني هو انا فايقه بقي اكتب يوم بيوم ... انا ألفتها في الاجازة اصلا وانقطعت فترة رمضان .. وربنا يسهل ع الاجازه اللي جايه اكملها .. عشان اكون اخدت خبرات اكتر بردو واحتكيت بناس اكتر

وارجع اقول تاني .. ده شخصيه خياليه ... مش موجوده والله عندنا في الكليه .. عشان بس محدش يفتكر غلط

 ها في أي أسئلة تاني ؟؟

عموماً باب التعليق مفتوح لكل الناس

 وكل سنة وانتم طيبـيــــن

 وفي مدونتنا منوريـــــن 

 وبيومياتنا مبسوطيـــــن