15‏/7‏/2010

الحلقة (8) عجلاوي والوراثة




عدّا حوالي اربعة خمسة اسابيع .. وأخينا عجلاوي زي ما هو .. من الجامعة ع البيت ... بس المشكلة انه بيرجع تعبان جدا ومش بيلحق يعمل حاجه غير انه يبيض محاضرة ولا حاجه ... انما مذكرة مفيش ..وعنده ماده اسمها Genetics
العملي فيها نظري .. من الاخر مادة عاوزة حفظ ومتابعة ..سواء محاضرات أو سكاشن ...


وفي مرة وهو في سكشن الوراثة ...غلبه النوم ... فنام علي كتف صاحبه اللي ماسك الموبايل وبيلعب فيه ...




المعيد(بصوت عالــي) : الأخ اللي نايم هناك ده ؟!!!!! أحسن نكون عاملينله إزعاج ولا حاجه ؟؟


صاحب عجلاوي : قوم ياله يا عجلاوي ..الدكتور بيكلمك ... قوم قوله صباح الخير 


عجلاوي ( ويبدو انه فعلا غلبه النوم يسمع كلام صاحبه بدون وعي ويقول ): صباح الخير


المعيد مستهذئاً: صباح الخيييييييييييير .. أحضرلك الفطار يا حبيبي ؟؟؟ ولا تحب تاكل ف الفرندة؟؟؟


عجلاوي : لا الله يكرمك يادكتور ده من عشمي في حضرتك .. بس لو كوباية شاي بحليب .. يبقي ميه ميه


 المعيد متعصباً: صحصح معايا يا دكتور وبلاش نوم وإلا قسماً مانت حاضرلي سكشن تاني


عجلاوي : معلش يا دكتور .. أصل دايماً كده بنام علي حدوتة حلوة زي سكشن انهارده


المعيد : حدوتة ؟؟ طب يلا بقي ورينا كده فهلوتك .. احكيلنا بقي يا حبيبي اللي انا حكيته في حدوتة انهارده


عجلاوي : وأحكي ليه يا دكتور... ماحضرتك  حكيتها مرة واحدة كفاية ...كده هتخليني أنام تاني وانا بحكيها
  ( يضحك السكشن )


المعيد : بطل هذار ياله ... أنا لغاية دوقتي صابر عليك ... انما بعد كده معرفش ممكن اعمل فيك ايه ...


عجلاوي : لالالالالالا والله يادكتور .... خلاص هقول أهو ... حضرتك كنت بتتكلم ف الوراثة ...


المعيد : لا يا راجل !!!! يعني أنا بتكلم ف الوراثة ... طب الحمد لله يعني مكنتش بتكلم ف التشريح ... اممممممممم .. برافوو عليك .. اسمك ايه بقي ؟؟؟


عجلاوي انبسط وفكّر ان الدكتور هيديله درجة ف الكشف 


عجلاوي : اسمي عجلاوي محمد عجلاوي يافندم 


المعيد علّـم عليه وعطاله غياب من السكشن


قرّر عجلاوي بعدها أن يذاكر وينتبه للسكشن ....





26‏/6‏/2010

الحلــقــــة (7)


السلام عليكم ... ياااااااااه دحنا ماكتبناش من زمان اوي .... يلا معلش كله يهون عشان خاطر الامتحانات .... اما اخينا عجلاوي بقي .... فها هو يرجع من جديد .. تكملة للحلقات السابقه .... اتمني تعجبكم ...

طبعا كانت محاضرة الانجلش اتأجلت .... ذهب عجلاوي الي كليته .. ودار هذا الحوار بينه وبين صديقيه عمــر ومحمد قبل بدء المحاضرة ...

محمد : صبّــح يا عجلاوي ...ايه ياعم انت شكلك لسه نايم ولا ايه

عجلاوي : اه والله الواحد نفسه ينااااااااام ... بلا محاضرة بلا سكشن .. انا خلاص زهقت

عمر : زهقت؟؟؟ زهقت ايه يا عم عجلاوي دحنا بنحسدك علي اصرارك ... وبعدين دحنا لســـــــه في سنة اولي .. خلي الزهق ده لسنه رابعه وخامسه ....

عجلاوي : ربنا يصبرنا بقي .... يظهر ابويا كان معاه حق ... يلا .... المهم، هو احنا عندنا محاضرة انجليزي دوقتي ؟؟

محمد : اه مش كانت اتأجلت الاسبوع اللي فات .. دي هتبقي اول محاضرة

عجلاوي : ياااااه أول محاضرة ... ده احنا لسه مشوارنا طويييييييييل ، وبعدين هم ليه حاطين المادة دي ، ما يغيروا شوية ، يحطوا الماني ،إيطالي ، اهو حاجه نستنفع بيها وتبقي جديدة ـ،أصل انا ولله الحمد كنت جايب 49 في الانجليزي في الثانوية .... أهو دي بقي الحاجه الوحيدة اللي فرحت بيها في الدرجات :))

محمد : هههههههههههههههه .. ياعم دانت المفروض يحطوك في المتحف المصري ويكتبوا عليك "الفارس المبجل عجـــلاوي "

عجلاوي : جري ايه ياعم الخفيف ...إحنا هنبتدي تريقة ولا ايه؟؟ د اني اراهن انك تخاف تقرب ناحية الحصان
                      
عمــر : إيه يا جدعاااااااان .. ماكنا كويسين .. قلبتوا ليه بس .. صلوا ع النبي كده .. ويلا عشان نلحق أي حاجه في المحاضرة اللي مش فايتة دي

وانطلق ثلاثتهم إلي المحاضرة التي لم يحضرها إلا القليل من الطلبة .. بإعتقادهم انها لاتستحق كل هذا الاهتمام ..
دخلوا وقعدوا في اخر بنش .. وانتبهوا لما يقوله الدكتور ولكن ......

عجلاوي : حد يقولي اني دخلت المحاضرة دي غلط

عمر : ههههههههههههه إيه يا مستر عجلاوي باشا ... اومال فين بركــات ال 49 في الانجليـــزي

محمد : ياجدعان الراجل بيفك عن نفسه شويه .. شكله مش بيعرف غير الانجليزي .. سيبكوا منه .. خلينا قاعدين شويه ونطلع

ومن ساعه ما دخلوا والدكتور ملاحظم وعمال يبصلهم  .. لكن هم مش واخدين بالهم ... وفجـــــــــــــــــــأة

The doctor : Excuse me , yea , you in the last desk ....

محمد : إيه يا جدعااان .. الراجل باينله بيشاور علينا ... اشطه عليك يا عجلاوي ...

The doctor : Anyone of You can talk to me ??

الدكتور طبعاً متحدث لبق في اللغة ... وكمان بيتكلم بسرعة .. عجلاوي قرر يرد عليه .. بس يا عيني ده عجلاوي ... صحيح جاب 49 .. بس ده written , not speaking

Eglawy :Yes doctor .

The doctor : Well , first What's ur 
name??

Eglawy : لم يرد عجلاوي ع السؤال .. حيث بدا له أن بعض الطلبة سيضحكون عليه أيضا هذه المرة علي اسمه

The doctor : What's up , son??
Have u forgotten Ur name??

Eglawy : No doctor ..My name is Eglawy Mohammed Eglawy.

Doctor : So, Eglawy.. Why do u hesitate to tell ur name?? Are u ashamed of ur name ??

لم يرد عجلاوي واكتفي بالاستماع ...

Doctor : Listen , If u were ashamed of a fact that's out of ur hand , How would u be with the daily faults ???
Son, U should be proud of ur name , and sometimes u have to ignore people's opinions ... Not all of them are true ... So don't care much about people ...

بالرغم ان الدكتور كان بيتكلم بسرعة .. وعجلاوي مش فهم حاجات كتير ... بس هو حس ان الدكتور بيدافع عنه :))

خلصور المحاضرة وعجلاوي راح شكر الدكتور ع الكلام اللي قاله والدكتور رحّــب به وبأصحابه ...

4‏/2‏/2010

الحـلقـة (6)

بعد انتهاء المحاضرة .. تعرّف عجلاوي علي زميل كان جالساً بجانبه اسمه عُمر ..وزميل اخر اسمه محمد ... ويبدو أن محمد وعمر قد اعجبهما شخصية عجلاوي ....

عُمـر : ههههههههههه.. دا انت طلعت تحفة يا عجلاوي :))

عجلاوي : أصل هقولك  علي حاجة يا عمر .. انا محبش حد يستفذني وأسكتله .. مش بيهمني اللي قدامي في حاجة فيها حقي ..

محمد : والله جدع يا عجلاوي .. الطيبة معدتش تنفع في الزمن ده .. يلا بقي يارجالة نروح نشوف أخبار الكتب إيه عشان احنا كده شكلنا هنقضيها سوّاحي ...

عمر: ياعم سوّاحي ايه .. دا احنا لسه في اول اسبوع .. أنا أخويا جاب الكتب بعد أسبوعين تقريباً ..

عجلاوي : هو اخوك معانا هنا في الكلية ؟؟

عمر : هو في سنه 2 .. بس مش هنا .. جاتله الاسماعيليه ولما استقر فيها  وعجبه الحال هناك مش رضي يحوّل ..

محمد : أيوه يا عم .. تلاقيه مظبطك بقي قبل ماتدخل الكلية

عمر : هههههههههه .. مظبطني ايه بس .. دانا  لو شفته في البيت ساعه يبقي كويس .. أخويا عايش حياته ع الاخــــر

في هذه الاثناء كان الظهر يؤذن ..

عجلاوي : طب يلا يا جماعه نروح نصلّي ألاول وبعدين نروح نسأل عن الكتب ..

راحوا الشباب يصلوا في مسجد الكلية ... وكان قلة من الطلبة حاضرين .. اتعرف عليهم وعملوا حلقة جميله بعد الصلاة .. وبعد كده راحوا لشئون الطلبة ...

عجلاوي : السلام عليكم ... مش دا مكتب شئون الطلبة ؟؟

الاستاذ : تمام .. شكلكوا كده في سنه اولي ..

عجلاوي متمتماً : إيه الفهلوة دي .. ذكي أوي

الاستاذ : أي خدمة يا دكاترة ؟

محمد : أه والله .. احنا كنا جايين نسأل عن الكتب .. نزلت ولا لسه ؟؟

الاستاذ : ماشاء الله ..و مالكم مستعجلين ع الهم بدري كده .. بكرة تزهقوا من المذاكرة ..

عمر : يا حضرت ياريت تجاوب علي قد السؤال الله يكرمك .. وإن كان علي الزهق فإحنا متعودين متقلقش إنت بس ...

الاستاذ : هو الحقيقة مفيش غير كتاب السلوكيات هو اللي نزل .. والكتاب ب 150 جنيه


عجلاوي : مفيش تخفيض طيب ؟؟!!!
الاستاذ : تخفيض !! علي أساس انك داخل محل ملابس مثلاً ولا ايه ؟؟ السعر ده محدش بيتحكم فيه غير الدكتور .. لأانه بيتعامل مع مطبعه معينة .. المهم .. هتشتروه؟؟


عمر : أه .. أنا هشتري ..

بس عجلاوي : لا انا مش عارف .. احتمال .. بس مش دوقتي

وبالرغم ان عجلاوي كان معاه في المحفظه ثمن الكتاب ..إلا انه لم يستطع ان يخرجها ليشتري الكتاب .. أخذ يفكر .. إذا كان أول كتاب ب 150 .. أومال باقي الكتب بكام ..؟؟؟

محمد : عجلاوي ... عجلاوي .... يا عجلااااااااااااااااااوي

طبعا عجلاوي كان ماشي معاهم بس سرحان مع نفسه ..

عجلاوي : ها ؟؟ أيوا يا محمد .. كنت بتقول حاجه ؟؟


عمر : لااااااااااااااا .. دانت شكلك مش هنا خااااااالص

وكان مفروض ان عندهم محاضرة انجلش ( اول محاضرة).. بس اتأجلت لبكرة ..

عجلاوي : طيب يا شباب ..ما دام محاضرة الانجليزي اتأجلت .. بينا بقي نتمشي شويه

عمر  متعجباً :  مش ممكن ؟؟ عجلاوي عاوز يتمشي .. لالالا .. ايه الانحراف ده يابني ههههههههه .. ماشي يا عم .. عشان ده اول طلب منك .. انا موافق

محمد : جميل جدا .. وانا هروح اجيب ساندويشات

وبعد مضي يوم حافل بالنشاط .. رجع عجلاوي مرهقاً .. ولم يتمكن حتي من تبييض المحاضرات :) .. إذ غلبه النوم ولم يستيظ الا علي معاد الكلية

31‏/1‏/2010

معذرةً للتأخير

السلام عليكم .. معلش يا جماعه .. انقطعت شويه عنكم .. بس لظروف الدراسه والامتحانات بس

 
.. دعواتكم بقي ربنا يسهلها في النتيجه .. وكل سنه وانتم طيبيييييين ..و يلا بينا نكمل يوميات عجلاوي ..

22‏/10‏/2009

الحلقة (5) عجلاوي وتاني ايام الكلية


جاء تاني يوم .. واخينا عجلاوي كالعادة صاحي من الفجرية ولبس هدومه ومشي ....وصل الكلية الساعه 6 ونص ومفكر هيلاقيها صاحية .. قصدي فاتحة :)

عجلاوي : إنت يا اخينا ياللي ع البوابة !! قوم افتح انا جيت

البواب : جيت مين وافتح ايه ؟؟؟ الكلية بتفتح بعد ساعتين ...

عجلاوي : ياعم افتح الباب طيب أحجز مكان في المحاضرة

البواب : دا ايه الناس العجيبة دي ؟؟ امري لله ... ادخل



عجلاوي راح حجز في تاني بنش وحطّ حاجاته وطلع تاني برا يروح يشرب كوباية شاي علي بال المحاضرة ما تبدأ ...

عجلاوي بيقول للبواب : إلا قولي يا بلدينا ...فين أعرف اشرب كوباية شاي متينة كده ؟؟

البواب : فيه كافتيريا اسمها كافتيريا الطلبة .. الشارع اللي جاي ع اليمين

راح عجلاوي لكافتيريا الطلبه .... أيوا جااااااااااااااااااي




عجلاوي : واحد شاي بنعناع لو سمحت ... بس يكون مظبوط و3 معالق سكر

الراجل : مفيش شاي بنعناع .. فيه شاي لوحده ونعناع لوحده

عجلاوي : خلاص .. هاتلي نص كوباية شاي ونص كوباية نعناع

الراجل : اصطبحنا واصطبح الملك لله

عجلاوي : إيه يا أخينا .! هي مراتك مزعلاك وجاي تطلعهم عليا انا ولا ايه ؟؟

الراجل : إمشي ياض من هنا ياض ... دا ايه الاصطباحية المهببة دي ياربي !!!

عجلاوي مشي وراح يدور علي كافتيريا تانية

عجلاوي : سلام عليكم .

الولد : وعليكم السلام .. اؤمر يا باشا ...

عجلاوي : عندكم شاي ؟؟

الولد : طبعاً ياباشا ... أحلي كوباية شاي هتشربها عندنا

عجلاوي : وعندكم نعناع ؟؟؟

الولد : عندنا طبعاً ياباشا .. أحلي كوباية نعناع هتشربها عندنا

عجلاوي : طب لو سمحت عاوز كوباية ينسون ..

شرب عجلاوي الينسون بتاعه .. وقعد اتعرف علي شوية شباب قاعدين علي القهوة ... وبعد كده افتكر انه عنده محاضرة وكان فاضل عليها يدوب 5 دقايق .. رجع بسرعة للكلية ودخل المدرج ... لقي مين قاعد مكانه ؟؟؟؟؟

عجلاوي : إيه ده ؟؟ مكاني !! إنتي يا انسة ياللي قاعدة في مكاني ؟؟ انتي يا ....

( التفت عجلوي الي الفتاة فوجدها منال )

منال :  إيه الدوشة اللي انت داخل بيها دي ؟؟ وبعدين انا مش قاعدة مكانك .. كتبك وحاجاتك اهي ياسيدي .. لو أعرف انها حاجااتك مكنتش اتنيلت وقعدت هنا أساسا

عجلاوي : والله انا خايف لتكوني مخابرات ولا حاجه !!! ومسلطينك عليا انا بجا ....بسا نا بجا مش هقعد غير لما تقومي من البنش كله ..

منال : والله انا جيت ولاقيت المكان فاضي ... عاوز تتفضل حضرتك وتاخد حاجاتك وتمشي .. تبقي عملت فيا جميل .. إنما أنا مش هقــــــــــــــــوم

وبينما هما علي ذلك الحال ... وصوتهما يكاد يسمعه طلاب اخر بنش .... دخل الدكتور فوجد عجلاوي واقفاً يتحدث بصوت عالي ..

الدكتور ( ملتفتاً إلي عجلاوي ) : إنت يابني ياللي واقف ... إنت يابني ..

عجلاوي ( مش واخد باله ان ده الدكتور ) : استنا ياعم انت كمان ..

الدكتور :عم ؟؟؟ اسمك إيه يالـَه

عجلاوي : إيه ده ؟؟ أأ ... أنا أسف جدا يادكتور والله ... أصل .... ( قطعه الدكتور )

الدكتور : إسمك؟؟؟

عجلاوي : عجلاوي يافندم ... عجلاوي محمد عجلاوي



الدكتور :: عجلاوي !!! ودخلت طب بيطري بإسمك بقي ولا بمجموعك ؟؟

أضحك ذلك الكثير من الطلبة ولكن ذلك لم يؤثر علي عجلاوي بل دفعه إلي رد صارم موجّه لهم جميعاً وأولهم الدكتور ...

عجلاوي : والله يادكتور أنا اعرف ان الشخصية هي اللي الانسان بيتعرف بيها.. مش بإسمه ... وبعدين مافيه اسماء كتيرة غريبة طالعة الايام دي ..ورغم كده الناس بتفضلها وتقول دا اسم جديد وماشي الايام دي .. حتي ميعرفوش معناها ايه ...المهم عندهم يكون جديد وشغال ..ولا اللي بيسموا عيالهم علي اسماء الممثلين والممثلات .. سايبين كل دول ومستغربين من اسمي ؟؟


الدكتوراُعجب بشجاعة عجلاوي واعتذر منه علي الكلام اللي قاله ..وقاله ( لو عوزت اي حاجه ابقي تعالي المكتب عندي )
ومنال هي كمان حاست انها جزء من المشكلة وانها تسبتله بإحراج .. فقامت ورجعت اخر بنش ..
ومرت المحاضرة بهدوء وسلام ..و قد أحضر معه في هذه المرة برايته .. :)

5‏/10‏/2009

الحلقه(4) عجلاوي مع الحصان



خرج عجلاوي من المحاضرة السابقه .


وبعد ذلك توجه إلي السكشن مباشرةً 
.. سكشن Behavior

ولم يلاحظ أن هناك فترة break



بين المحاضرة والسكشن ...ورغم ان جميع الطلبة والطالبات تبدو عليهم ملامح الفرحة والسعادة بالجو الجديد بالجامعه ... إلا ان عجلاوي استقبل يومه الاول في الجامعه بشئ من الاستغراب والمقارنه بين حاله وحال هؤلاء الطلبة الاخرين ...

وبينما هو جالس في ركن ما .. جاء عم عيسوي السايس بتاع الحصان .. ومعاه الحصان .. ثم ترك الحصان يأكل من العشب .. وذهب

عجلاوي : وااااااااه .. إيه الحصان الابيض ده :)) ده شكله جميل جوي .. أمـّـا اروح اشوفه كده ...




 

عجلاوي راح قرّب من الحصان وحسّس عليه ..ومن فرحته بالحصان وبلونه الابيض الناصع ... فكّر في انه يركب عليه .. وبالفعل ركب علي الحصان واخذ يتجول به هنا وهناك .. وعندما رآه الطلبة أخذوا جميعهم في الضحك الشديد عليه ... بل أخذوا يصورونه بالموبايلات
وبينما هو كذلك ..... راه دكتور السكشن

الدكتور : إنت يابني ... انت فاكر نفسك في نادي الخيول ولا ايه ؟؟؟انزل يالََـَه ... وفين الزفت اللي اسمه عيسوي ده كمان ..!!

عجلاوي :: آآآن ... آآناا ...أنا اسف والله يا دكتور .. انا بس كنت ...

قطعه الدكتور

الدكتور : كنت بتشوف الارصاد الجوية من فوق صح؟!! يلا روح نادي زمايلك عشان هبدأ السكشن

عجلاوي : لا يادكتور والنبي اعفيني ... خلّي عم عيسوي يناديهم ... عموما هم اكيد 5 دقايق وتلاقيهم جايين .. هيروحوا فين يعني ..

بدأ الدكتور السكشن ببعض التعاريف التي يجب علي الطلبة معرفتها فيما يتعلق بمادته ... ثم بعد ذلك أدخل الحصان .. مما أرهب الكثير من الطلبة وطبعاً الطالبات ... إلا أخينا عجلاوي ... فلم يكن بداخله تلك الرهبة ..

الدكتور إيه يا دكاترة المستقبل ؟!! إنتوا هتخافوا من أولها ؟؟ لأ لازم تعرفوا ان الحصان إو أي حيوان لما بيشوف ان الانسان اللي قدامه خايف .. هو كمان بيبادله نفس الشعور تجاهه ... واحتمال كبير يرفثه كمان .. ها؟؟ مين عنده الشجاعه بقي يطلع يقولنا اللي انا قولته ؟؟ أه .. إنت ( يشاور علي عجلاوي ) أيون إنت ... اللي عملتلي فيها جوكي انهارده ... تعالي ورّي زمايلك هندلت الحصان إزاي ...

عجلاوي طلع ووقف جمب الحصان وقعد يحسّس بايده عليه ... ويبدو أن الحصان أخد عليه هو كمان .. فلم يصدر صوتاً او لم يحرك ذيله ... مما أبهر الطلبة  :)

عدّا أول يوم علي خير :) .. ورجع عجلاوي البيت واستقبلوه أخواته كأنه راجع من بلاد برا ... وأخذ يقص عليهم أحداث اليوم وكيف أنه أبهر الدكاترة والطلبة :))))))

 تابعونا مع

عجلاوي وتاني ايام الكلية


2‏/10‏/2009

الحلقة (3)

دخل عجلاوي المحاضرة ...وملقاش مكان غير في اخر بنش ..
كان فيه بنت قاعدة .. قعد علي بعد متر كده منها ..
وبدأ الدكتور بالترحيب لطلبة الدفعة الأولي وأنه يتبسم في وجوههم خيـــراً ... وأخذ يخبرهم عن مادته ..
ال Anatomy
تشريح يعني
وفي وسط المحاضرة ...


عجلاوي : والنبي يا آنســه .. عايز بـرّايــة

البنت : بــرّايــة إيه؟!! إنت في كلية حضرتك مش في حضانة !!!

عجلاوي : ياستي وانتي مالك !! معاكي ولا لأ ؟؟

البنترد وهي متنرفذة ): لأ مش معايا ..

عجلاوي : طب ما تزعقيش ...


عجلاوي خبـّـط علي البنش بحيث إن الدفعة كلها سمعته ... وعندما تلفت الجميــع إليه قال 

  


والنبي يا جماعة إلاقي مع حد فيكم بــرّايــة "

أخذ الجميع يضحكون عليه ... والدكتور لاحظ ذلك وطلب من الجميع الهدوء .. وهدّد عجلاوي بالإنصراف مالم يقعد هادئاً

البنت (بصوت منخفض) : إيه اللي هببته دا !!! انت فاكر نفسك فين ؟؟

عجلاوي : مش لو كنتي معاكي بــرّايــة دلوجتي .. مكنش كل ده حصل !!!!

البنت : طيب طيب .. أنا هكتب المحاضرة وفي الاخر إبقي صوّرها ..

عجلاوي : متشكر جوي يا آنسة .... ؟؟ أنتي اسمك ايه ؟؟

البنت : منال

عجلاوي : متشكر جوي يا أنسة منال .. معاكي عجلاوي محمد عجلاوي :)

البنت (وهي تضحك ) : اسمك !!!!!!! عجلاوي !!

عجلاوي : إيوه اسمي عجلاوي وبلا فخر ..

البنت :طيب يا دكتور عجلاوي .. ممكن تسكت بقي عشان أعرف أكمل المحاضرة ..

عجلاوي : وريني كده خطك .. إيه العفاشة دي ... دا خط دا ؟؟؟  هقراه إزاي انا دلوجتي !!!

البنت : عفاشة !! والله أنا غلطانة أصلاً إني عرضت عليك تصوّرها .. روح دوّر بقي علي حد يدلك المحاضرة ..

عجلاوي : ياستي حقك عليا .. بس حسـّـني خط شويه عشان أعرف اقرااااه ..

البنت : هو خطي كده .. وبعدين فيه رسومات كتيرة ولازم ابقي سريعه شويه ...

وقبيل انتهائ المحاضرة ... الدكتور بيسأل الطلبة




الدكتور : ها يا شباب .. فيه أي أسئلة ؟؟

عجلاوي رفع إيده .. ويبدو إنه الوحيـــد اللي طلب يسأل

عجلاوي : آه يا دكتور ... بالنسبة يعني للكشكول ؟! نجيبه كام صفحه ؟؟

ولتاني مرة يـُـثير عجلاوي ضحك الطلبة عليه وكأنه من كوكب آخر ...

الدكتور : كشكول ايه يابني ... ماتكتب في اي حاجه ..

وانصرف الدكتور محدّثاً نفسه : صبّرني يارب

29‏/9‏/2009

الحلقة (2)




وعــدت الأيام .. وجاء أول يوم في الجامعه .. وعجلاوي مانمش طول الليل  .. ومن الفجر لبس هدومه وحضّــر حاجاته ... وطبعاً مامته لازم ترقيه قبل مايمشي .. يلا بينا نشوف

عجلاوي : يلا يامّــه الساعه بجت 6 .. عاوز ألحق مواصلات بدري بدري عشان أكيد الجامعه بتفتح بدري

أم عجلاوي : حاضر يا حبيبي .. أنا بس بعملك 7 او 8 ساندويتشات عشان لما تجوع ..أوعي يا واد تجيب أكل من برّا .. آآه دول بيقولوا انه بيجيب سرطان بعد الشر عننا كلنا ..و سمـّــي كده يا حبيبي .. وخليك مركز .. و....

عجلاوي : ما خلااااااااص يا مـّـه ,, والله حفظت كل حاجه .. وبعدين أنا بجيت راجل يـُعتمد عليه ..... ادعيلي انتي بس يامـّـه ربنا يفتحها في وشي ...

أم عجلاوي : روح يابني .. إلهي يوقفلك ولاد الحلال ويبعد عنك شر الطريق

وصل عجلاوي الجامعه والحمد لله .. وبالرغم من هذا العالم الجديد .. إلا أن ذلك لم يُـحدث تغييراً ملحوظــاً علي طلاب الثانوية العامة ... طبعاً بإستثناء أخينا عجلاوي .. والذي بدا مندهشاً لهذا الحشد من الطلبة والجو المحيــــــط.....


عجلاوي : ياااااااااااه .. إيه الناس دي كلها .. أومال لو كانوا بيوزعوا لحمة كانوا بقوا اد ايه ؟؟!!


عجلاوي شاف واحد كده داخل لوحده .. فقام راح عليه


عجلاوي : سلام عليكم يا دفعة .. إنت معانا في سنة إولي ؟؟

الثاني : لا والله انا في سنه تانيه ..

عجلاوي : آآه .." عجلاوي متعجب من اللي أخينا لابسه بنطلون ساقط وشعر جيل وقميص كاجوال ...


عجلاوي : انت ازاي تنسي حزام البنطلون ؟؟يعني عجبك منظرك كده والبنطلون شويه وهيقع منك ... خلّي اللي مايشتري يتفرج بجي ....



التاني : ههههههههههههههههههههههههه ... عجباني أوي لهجتك دي يا مان ..إنت كده ولا بتمثل !

عجلاوي : أمثل إييييييييه يا أخينا .. إحنا جايين نهــذِّر ولا إييييييييييه

التاني : هههههههههههههه .. ياعم ماتزعلش نفسك ..خليك كوول ... أنا رايح أشوف الشلة بتاعتي .. وانت روح دوّر علي حد يفهمك .. سلام يا كابو

عجلاوي بدا غاضباً من ذلك الولد .. وأسلوبه الجديد .. وبدأ يفهم أنه سيعاني قليلاًَ في معاملاته مع من هم مثل ذلك الولد ... وبالطبع معظم الدفعه ...المهم .. راح شاف جدوله ونقله ... وراح علي اول محاضرة